भाजप पदाधिकारी शरद फडोळ यांना फोनवरून जीवे ठार मारण्याची धमकी..
नाशिक नितिन चव्हाण
नाशकातील भाजप पदाधिकारी शरद फडोळ यांना अनोळखी व्यक्तीने फोनवरून जीवे ठार मारण्याची धमकी दिल्याची खळबळजनक घटना घडली आहे. या घटनेमुळे राजकीय आणि सामाजिक वर्तुळात एकच खळबळ उडाली असून, या प्रकरणी अंबड पोलीस ठाण्यात गुन्हा दाखल करण्यात आला आहे.
घटनेविषयी सविस्तर माहिती अशी की, गुरुवारी (दि. ९ ऑक्टोबर) रात्री सव्वा अकराच्या सुमारास शरद फडोळ हे घरी असताना त्यांना एका अनोळखी क्रमांकावरून फोन आला. संबंधित व्यक्तीने अर्वाच्य भाषेत शिवीगाळ करत “गोळीबार करून ठार मारेन” अशी धमकी दिली. या धमकीमुळे फडोळ यांना काही काळ भीतीचे वातावरण निर्माण झाले. तत्काळ त्यांनी अंबड पोलीस ठाण्याचे वरिष्ठ पोलीस निरीक्षक जगवेंद्रसिंग राजपूत यांची भेट घेत झालेला संपूर्ण प्रकार कथन केला.
फडोळ यांच्या फिर्यादीवरून अंबड पोलीस ठाण्यात अदखलपात्र गुन्हा दाखल करण्यात आला असून, पुढील तपास हवालदार सोमनाथ गुंड यांच्या मार्गदर्शनाखाली सुरू आहे. पोलिसांकडून धमकी देणाऱ्या संशयिताचा फोन नंबर आणि ठिकाण शोधण्याचे प्रयत्न सुरू आहेत. त्या व्यक्तीने ही धमकी कुणाच्या सांगण्यावरून दिली आणि त्यामागचा हेतू काय आहे, याचा तपास सध्या सुरू आहे.
दरम्यान, पोलीस आयुक्त संदीप कर्णिक यांच्या मार्गदर्शनाखाली नाशिक शहरात गुन्हेगारांविरोधात मोठ्या प्रमाणावर धरपकड मोहीम सुरू आहे. शहरातील सर्व पोलीस ठाण्यांच्या हद्दीत गुन्हेगारी रोखण्यासाठी पोलिसांनी अलीकडेच कडक कारवाई सुरु केली आहे. नागरिकांकडून या मोहिमेचे स्वागत होत असताना, अशा प्रकारे एका राजकीय पदाधिकाऱ्याला फोनद्वारे जीवे मारण्याची धमकी देणाऱ्या संशयिताने जणू पोलिसांनाच आव्हान दिल्यासारखे चित्र निर्माण झाले आहे.
या घटनेमुळे राजकीय वर्तुळातही चर्चेला उधाण आले असून, पोलिसांकडून आरोपीचा लवकरात लवकर शोध घेऊन त्याच्यावर कडक कारवाई करण्याची मागणी होत आहे.
