शिवाजी चुंबळे यांच्या मक्याच्या शेतात
बिबट्याच्या हल्यात मजूर बचावला
नाशिक :,नितिन चव्हाण
पिंपळगाव खांब येथे पुन्हा एकदा बिबट्याचा खुलेआम वावर असल्याचे निदर्शनास आल्याने या भागातील शेतकऱ्यांमध्ये दहशतीचे वातावरण असून शेतीमधील कामे करण्यासही अडचणी येत आहे. कृषी उत्पन्न बाजार समितीचे माजी सभापती शिवाजी चुंभळे यांच्या शेतावरील कुशल हरळ या मजुरावर शनिवारी दि. ३१ मे रोजी दुपारच्या वेळी बिबट्याने हल्ला करण्याचा प्रयत्न केला. मात्र मजुराने प्रसंगावधान राखत तात्काळ घराकडे धाव घेतल्याने बिबट्या मक्याच्या शेतात पळून गेला.
पिंपळगाव खांब येथे काही दिवसांपूर्वी बिबट्याच्या हल्ल्यात एक शेळी ठार झाल्यानंतर दुसऱ्याच दिवशी एका बंगल्याच्या आवारात चार बिबट्यांचा वावर असल्याचे सीसीटीव्ही कॅमेरात कैद झाले होते. त्यानंतर वनविभागाने या भागात बिबट्याला जेरबंद करण्यासाठी पिंजरा लावला होता. गेल्या दोन महिन्यात या पिंजऱ्यात बिबट्या जेरबंद झालेला नाही. त्यातच शनिवारी दि. ३१ मे रोजी दुपारी पुन्हा एकदा बिबट्याचा खुले वावर स्थानिक शेतकऱ्यांच्या निदर्शनास आला. पिंपळगाव खांब येथे शिवाजी चुंभळे यांच्या शेतावर बिबट्याच्या वावर सर्रासपणे होत असल्याने दहशतीचे वातावरण असून शेतीमधील कामे करण्यासही अडचणी येत आहे. वनविभागाने बिबट्याला जेरबंद करण्यासाठी याा ठिकाणी पिंजरा लावावा, अशी मागणी शिवाजी चुंभळे यांनी केली आहे.
----------------------------
प्रतिक्रिया
पिंपळगाव खांब परिसरात बिबट्याचा वावर असल्याचे निदर्शनास आले असल्याने शेतकऱ्यांनी शेतीचे कामे करताना काळजी घ्यावी. रात्रीच्या वेळी बाहेर फिरू नये व सतर्क रहावे. विभागाने बिबट्याला जेरबंद करण्यासाठी प्रयत्न करावे. शेतीचे कामे करताना शेतकऱ्यांनी सतर्क रहावे.
शिवाजी चुंभळे, माजी सभापती, कृषी उत्पन्न बाजार समिती, नाशिक
